ដោយ : បន្ទាយ
បន្ទាយមានជ័យ : ក្នុងបរិវេណនៅក្នុងវិទ្យាល័យ ហ៊ុនសែន ខ្លាកូន វិថី៧មករា ស្ថិតក្នុងភូមិខ្លាកូន សង្កាត់កំពង់ស្វាយ ក្រុងសិរីសោភ័ណ បានរៀបចំពិព័រណ៍ស្នាដៃសិស្ស ការប្រឡងសំណេរដើម្បីទទួលរង្វាន់ និងកម្មវិធីផ្សេងៗទៀតដើម្បីសម្រាកវិស្សមកាលតូចរដូវក្តៅនិងអបអរសាទរបុណ្យចូលឆ្នាំខ្មែរឆ្នាំម្សាញ់ប្រពៃណីជាតិ។ កម្មវិធីនេះធ្វើឡើងរយ:ពេល២ថ្ងៃទី ៥-៦ ខែមេសា ២០២៥ ។
គួររំលឹកថា វិទ្យាល័យហ៊ុន សែន ខ្លាកូន ទទួលពីក្រសួងអប់រំ យុវជននិងកីឡានូវពានរង្វាន់សាលារៀនគំរូសម្តេចធិបតីហ៊ុន ម៉ាណែត នាយករដ្ឋមន្ត្រី ឆ្នាំ២០២៣-២០២៤ គឺក្នុងចំណោមគ្រឹះស្ថានសិក្សាសាធារណ: ៨ ក្នុងខេត្តដែលទទួលស្នាដៃឆ្នើម ។ក្នុងនោះមានរៀបចំស្តង់ពិព័រណ៍ស្នាដៃសិស្សចំនួន ៣៥ស្តង់ និង មានការប្រឡងសំណេរយករង្វាន់ទៀតផង។
លោក សុខ ចំណាន នាយកវិទ្យាល័យហ៊ុន សែនខ្លាកូនបានឲ្យដឹងថា: ពិព័រណ៍ស្នាដៃសិស្ស ការប្រឡងសំណេរដើម្បីទទួលរង្វាន់ និងកម្មវិធីផ្សេងៗទៀតនោះ មានស្តង់ពិព័រណ៍ទាំង៣៥ ដែលជាស្នាដៃបង្កើតឡើងដោយសិស្សានុសិស្សសុទ្ធសាធ គឺតាមមុខវិជ្ជាដូចជា គណិតវិទ្យា រូបវិទ្យា គីមីវិទ្យា ជីវវិទ្យា ភាសាខ្មែរ ប្រវត្តិវិទ្យាជាដើម ។
បើតាមលោកនាយក ការបង្កើតឲ្យមានកម្មវិធីនេះឡើងក្នុងគោលបំណងចង់បង្ហាញអំពីសកម្មភាពសិស្សជំនាន់ថ្មីនៅទីនេះ តើមានសកម្មភាពបែបណា ? កម្រិតណា? និងសមត្ថភាពរបស់សិស្ស ចង់ឲ្យមាតាបិតា អាណាព្យាបាលសិស្ស សហគមន៍ និងភ្ញៀវកិត្តិយសបានឃើញអំពីលទ្ធផលសិក្សារបស់សិស្ស មានភាពឆ្នៃប្រឌិតបានដូចម្តេចខ្លះ? គំនិតបង្កើតថ្មីបានយ៉ាងណាខ្លះ ? ហើយការ បង្កើតឲ្យមានកម្មវិធីតាំងពិព័រណ៍នេះឡើង ដើម្បីចង់បង្ហាញឲ្យឃើញគុណភាពចំណេះដឹងរបស់សិស្សានុសិស្សដែលលោកគ្រូ អ្នកគ្រូបានបង្ហាត់បង្រៀននិងផ្ទេរអោយកន្លងមកផងដែរ។
ក្នុងឱកាសនោះ លោក ឈូ ប៊ុនរឿង ប្រធានមន្ទីរអប់រំ យុវជននិងកីឡាខេត្តបន្ទាយមានជ័យបានមានប្រសាសន៍ថា : មន្ទីរមានការវាយតម្លៃខ្ពស់ចំពោះការបង្ហាញស្នាដៃឬការងាររបស់សិស្សវិទ្យាល័យហ៊ុន សែនខ្លាកូន លើប្រធានបទវិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា លើសពីនេះ បង្ហាញបច្ចេកវិជ្ជានៅក្នុងផ្នែកមនុស្សយន្ត ឧបករណ៍និម្មិតនិងព័ត៌មានវិទ្យាជា ដើម ដើម្បី
ពន្យល់ដល់សិស្សផ្សេងទៀតដើម្បីឈ្វេងយល់ពីកិច្ចខិតខំប្រឹងប្រែងទាំងអស់ តាមរយៈការផ្សព្វផ្សាយវិស័យអាជីព ដល់សិស្សានុសិស្ស និងលើកកម្ពស់ការគិតពិចារណាក្នុងការរៀនសូត្រដល់សិស្ស លោកគ្រូ អ្នកគ្រូ និងមាតាបិតានៅទូទាំងខេត្តបន្ទាយមានជ័យផងដែរ។
ចំណែកលោក យឹម សំណាង អភិបាលរងខេត្តបន្ទាយមានជ័យបានសម្តែងនូវការសប្បាយរីករាយចំពោះស្នាដៃទាំងអស់ដែលក្រុមសិស្សទាំងអស់បានខិតខំសាមគ្គីគ្នាប្រើគំនិត សកម្មភាពរួមគ្នាដើម្បីបង្កើតជា ពិព័រណ៍ស្នាដៃសិស្ស ប្រឡងសំណេរ និងកម្មវិធីផ្សេងៗទៀត ដើម្បីអបអរសាទរបុណ្យចូលឆ្នាំខ្មែរប្រពៃណីជាតិ ។នេះបានបង្ហាញឲ្យឃើញថាយុវជនយុវនារីមានការយល់ដឹងខ្ពស់ពីបញ្ហាគ្រឿងញៀន និងបារីអេឡិចត្រូនិច បើសិនណាបានប្រព្រឹត្ត ក្លាយជាជនរងគ្រោះនិងសង្គមស្អប់ខ្ពើមជាទីបំផុត។
លោកយឹម សំណាង បាបន្តថា : ក្រោមការដឹកនាំប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចេញនូវកម្មវិធីគោលនយោបាយយុទ្ធសាស្ត្របញ្ចកោណ ដំណាក់កាលទី១ ដែលមានការកែទម្រង់ ការអភិវឌ្ឍមូលធនមនុស្ស ដែលយកចិត្តទុកដាក់លើការពង្រឹងគុណភាពវិស័យអប់រំ កីឡា វិទ្យាសាស្ត្រ បច្ចេកវិទ្យា និងការបណ្តុះបណ្តាល ជំនាញបច្ចេកទេស បានក្រើនរំលឹក និងជំរុញឲ្យសិស្សានុសិស្សទាំងអស់ បន្តខិតខំរៀនសូត្រ ស្រាវជ្រាវ និងអភិវឌ្ឍន៍ខ្លួនឲ្យបានខ្ជាប់ខ្ជួន ជាពិសេសតាម បរិបទសង្គមឌីជីថល និងចូលរួមធ្វើអំពើល្អដើម្បីការរីកចម្រើននៅក្នុងគ្រួសារ សង្គម និងក្លាយជាទំពាំងស្នងឬស្សី សម្រាប់ប្រទេសជាតិយើងទាំងមូលផងដែរ៕
